MANILA, Philippines - Patay ang dalawang mangingisda habang dalawa pa ang nasugatan matapos na paulanan ng bala ng hindi pa nakilalang mga armadong lalaki habang nanghuhuli ng isda sa Talisay City, Cebu kamakalawa.
Kinilala ang mga nasawi na sina Welcres Camingawan, 28 anyos at Victor Labarejos, pawang ng Sitio Crusher, Barangay Lawaan 3, Talisay City. Ang mga ito ay pawang natadtad ng mga tama ng bala sa ulo, tiyan, leeg at balikat na agaran nilang ikinamatay.
Nasugatan naman si Jeffrey Capino habang masuwerte namang nakaligtas ang tatlo pa nilang kasamahan.
Batay sa ulat na nakarating sa Camp Crame, naganap ang insidente sa Barangay Mohon sa Talisay City.
Nabatid na nanghuhuli ng isdang hito sa isang maputik na palayan ang anim nang dumating ang mga suspek at pinagbabaril ang mga biktima. (Joy Cantos)