MORONG, RIZAL, Philippines – Nalibing nang buhay ang isang 53-anyos na lola makaraang matabunan ang kanyang tinitirhang kubo ng buhangin buhat sa isang dump truck kamakalawa ng umaga sa bayang ito.
Hindi na naisalba ang buhay ng biktimang nakilalang si Nena Malenab ng Alamaris Compound, Sitio Sagbat, Barangay Maybangcal ng bayang ito.
Arestado naman ang driver ng Isuzu dump truck (XFU-586) na si Edgar Castillar, 39-anyos, na nahaharap sa kasong reckless imprudence resulting to homicide.
Nagdidiskarga ng buhangin ang naturang truck na minamaneho ni Castillar nang magkaroon ng problema sa makina nito.
Hindi na nakontrol ni Castillar ang bigat ng kanyang karga kung saan tumagilid ang dump box sa likod ng trak at diretsong nabuhos ang ilan daang kilong buhangin sa kubo ng pamilya Malenab. Nabatid naman na nag-iisa sa bahay ang biktima na nalibing ng buhay.
Nasawi ang biktima dahil sa tinamong mga sugat buhat sa bumagsak na mga bahagi ng kanyang bahay dagdag pa na hindi ito nakahinga dahil sa tumabong buhangin. (Danilo Garcia)