Lolo at lola kinatay

RODRIGUEZ, RIZAL, Philippines – Tadtad ng taga sa iba’t ibang bahagi ng katawan nang matagpuan ang bangkay ng isang mag-asawang ma­tanda sa loob ng kanilang bahay kahapon ng umaga sa bayang ito.

Kinilala ng pulisya ang mga biktima na sina Jesus Be­ne­ dicto, 70, at Natividad, 70 an­yos, mga magsasaka at na­ninirahan sa liblib na ba­rangay sa Sitio Calumpit, Ba­rangay Macabud, ng bayang ito.

Sa ulat ng Rodriguez municipal police, dakong alas-8 ng umaga nang madiskubre ang mga bang­kay ng mag-asawang ma­tanda ng mga batang nag­lalaro sa bakuran ng ta­hanan ng mga ito. Agad namang ipinagbigay-alam ito sa mga opisyal ng ba­rangay na siyang humingi ng responde sa pulisya.

Sa pagsusuri ng pulisya, nagtamo ng malalalim na taga ng itak sa leeg at iba pang bahagi ng katawan ang dalawa na sanhi ng kamatayan ng mga ito. 

Hinihinala naman na ilang araw nang patay ang mga biktima dahil sa nag-uumpisa nang maagnas ang mga bangkay.

Blangko pa ang pulisya kung sino ang mga suspek na pumaslang sa mga bik­tima. Ilang kapitbahay na­man ang inimbitahan ng pulisya upang kunan ng pahayag. (Danilo Garcia)