BATANGAS, Philippines – Maagang nagwakas ang buhay ng isang anak ng prominenteng pamilya sa Batangas habang sugatan naman ang dalawang kasambahay nito makaraang pagsasaksakin ng dalawang magnanakaw na nanloob sa bahay ng una noong Linggo ng hapon sa Barangay Mahabang Parang, Batangas City, Batangas.
Kinilala ni P/Supt. Manuel Abu, Batangas City police chief, ang biktimang si Angelic Faytaren Turino na anak ng pamilyang Faytaren, na kilalang mga negosyante. Nasa kritikal na kondisyon naman ang dalawang kasambahay na sina Maryjane Villacacan, 17; at Justin Puwiran, 22, kapwa nasa Saint Patrick Hospital.
Sa follow-up operation, naaresto at kinasuhan naman ang dalawang suspek na sina Erwin Turino, 32, kamag-anak ng biktima; at si Rowel Bauzon. Ayon sa ulat, nilooban ng mga suspek ang bahay ng biktima bago tinangay ang US$900, P80,000 at assorted jewelries na umaabot sa P.3 milyon. Papatakas na sana ang mga suspek nang mamataan sila ng mga biktima kaya pinagbalingang pagsasaksakin. (Arnell Ozaeta)