CAMP VICENTE LIM, Laguna, Philippines – Kinarit ni kamatayan ang isang 40-anyos na misis samantalang sugatan naman ang 26 iba pa makaraang magsalpukan ang dalawang pampasaherong bus sa Maharlika Highway sa Brgy. Villabota, Gumaca, Quezon kamakalawa ng hapon.
Kinilala ni P/Chief Inspector Giovanni Caliao, hepe ng pulisya sa bayan ng Gumaca, ang nasawing biktima na si Nelia Alvarez-Capisonda ng Pepito St. Tumana, Marikina City.
Namatay si Capisonda kahapon ng umaga habang ginagamot sa San Diego Hospital dahil sa matinding sugat sa ulo at katawan.
Base sa police report, sumalpok ang Philtranco bus (PYG-906) ni Cyril Barreda sa kasalubong na AB Liner bus (TXH-584) ni Eugene Evangelista bandang alas-12:30 ng hapon
Napag-alamang nag-overtake ang Philtranco bus na patungong Bicol mula sa Manila sa kurbadang kalsada kaya nabangga ang kasalubong na AB Liner na patungo namang Manila mula sa Bicol.
Sumalpok pa ang Philtranco bus sa bahay na pag-aari Mr. Victoria bago inararo ang bakod ng San Miguel Corp. warehouse.
Isinugod ang mga sugatang biktima sa Gumaca District Hospital at San Diego Hospital. Arnell Ozaeta at Tony Sandoval