BULACAN, Philippines – Nagkabutas-butas ang katawan ng isang 78-anyos na lolo habang malubha naman nasugatan ang mag-lola makaraang ratratin ng ’di-kilalang lalaki ang kanilang tindahan sa panibagong karahasang naganap sa bayan ng Sta. Maria, Bulacan kamakalawa ng gabi.
Kinilala ng pulisya ang nasawing biktima na sina Remigio Sanchez, habang ginagamot naman sa Rogasciano Mendoza Memorial Hospital ang mag-lolang Victoria, 73; at apong si Marlon, 26, pawang naninirahan sa Sitio Gulod, Barangay Bulac sa nabanggit na bayan.
Sa police report na nakarating kay P/Supt. Marcos Rivero, dakong alas-7:30 ng gabi habang nag-aayos ang mag-asawang Sanchez katuwang ang kanilang apo para magsara ng kanilang tindahan nang bumaba sa pampasaherong jeepney na may plakang USJ 767 ang isang ’di-kilalang lalaki.
Kasunod nito ang sunud-sunod na putok ng baril na tumama sa mga biktima habang naglahong parang bula ang gunman.
Samantala, patuloy naman ang imbestigasyon ng pulisya.