STA.BARBARA, Pangasinan, Philippines — Rehas na bakal ang binagsakan ng tatlong kalalakihan makaraang maaresto ng pulisya dahil sa pag-iingat ng mga baril na walang kaukulang papeles kamakalawa sa bisinidad ng Barangay Minien sa bayan ng Sta. Barbara, Pangasinan. Kinilala ni P/Supt. Eric Noble, hepe ng Sta. Barbara PNP, ang mga suspek na sina Ruben Rosario, 32; Orlando Antonio, 35; at si Robin Gonzales, 39, pawang naninirahan sa Barangay Minien East. Nakumpiska sa tatlo ang isang M14 rifle na may pitong magasin at 106 bala, AK47 rifle na may 4-magasin at 92 bala; at isang cal.45 pistola na may magasin at 8-bala. Sumasailalim pa sa tactical interrogation ang mga suspek. Cesar Ramirez