Bodega ng paputok nasunog; 2 utas

BULACAN – Dalawang sibilyan ang kumpirmadong nasawi habang isa pa ang nasa kritikal na kondisyon makaraang masunog ang bodega ng paputok sa Sitio Balubaran, Barangay Duhat sa bayan ng Bocaue, Bula­can noong Biyernes ng gabi.

Kinilala ng pulisya ang nasawi na sina Pedrito Tur­cino at Ogie Asero, ha­bang nagtamo naman ng 3rd degree burn si Edwin Torcino na ngayon ay nasa Jose Reyes Memorial Hospital sa Maynila.

Sa ulat ni P/Supt. Ronald De Jesus, hepe ng pulisya sa Bocaue, ang mga biktima ay pawang nagtatrabaho sa pabrika ng  E & B Fireworks na pag-aari ni Edwin Corpuz ng Barangay Batia sa bayan ng Bocaue.

Sinabi ni Bulacan Provincial Police Office (PPO) Director Sr. Supt. Allen Bantolo, na­ganap ang pagkasunog ng bodega ng nasabing pabrika ng paputok dakong alas-10:30 ng gabi habang ang nasabing mga traba­hador ay mahimbing na natutulog.

Base sa police report, lu­militaw na natutulog ang mga biktima nang mag-short circuit at kumislap ang isa sa linya ng kuryente sanhi ng epekto ng mga ke­mikal na gi­nagamit sa pag­gawa ng pa­putok kaya big­lang suma­bog saka ku­malat ang apoy sa paligid ng bo­dega kung saan nakulong ang mga bik­tima habang pa­tuloy naman ang imbes­ti­gasyon ng pu­lisya. (Dino Balabo)