Malagim na Bagong Taon ang sinapit ng isang tinedyer makaraang pugutan ng ulo ng ‘di-pa nakilalang lalaki na sinasabing naging karibal nito sa pag-ibig sa kaniyang ka-textmate na dalaga sa bayan ng Dumangas, Iloilo noong Sabado ng umaga.
Kinilala ang nasawing biktima na si Eduardo Lozarito, 18, ng Cayan Oeste sa Lambunao, Iloilo.
Patuloy naman ang manhunt operation ng pulisya laban sa suspek na sinasabing adik sa droga at masugid na karibal sa pag-ibig ng biktima.
Batay sa police report na nakarating sa Camp Crame, natagpuan ang bangkay ng biktima sa liblib na bahagi ng Sitio Buhang, Ilaya, 1st Dumangas kung saan nakahiwalay na ang ulo nito sa katawan bandang alas-6 ng umaga.
Pinaniniwalaan naman ng mga imbestigador ng pulisya na may ilang oras pa lamang iniwang patay ang biktima base na rin sa mga patak ng dugo sa katawan nito.
Sa salaysay sa pulisya ni John Sandoval, 19, kasamahan sa bahay ng biktima, nagpaalam sa kanya ang kaibigan kamakalawa ng gabi upang dumalaw at tuloy ay umakyat ng ligaw sa ka- textmate na dalaga sa Barangay Bacay, Dumangas subali’t nabigo na itong makauwi.
Lumilitaw sa imbestigasyon na pumunta lamang sa bayan ng Dumangas ang biktima upang magtrabaho sa sakahan hanggang sa may makilala itong magandang dalaga sa pamamagitan ng text messages at kanyang niligawan.
Gayon pa man, nakatanggap ng pagbabanta ang biktima sa sinasabing karibal nito na pinagsabihan itong tigilan na ang panliligaw sa dalaga kung hindi nito nais na mapahamak. (Joy Cantos )