Naghugas-kamay kahapon ang Moro Islamic Liberation Front (MILF) kaugnay ng serye ng pambobomba sa Mindanao.
Sinabi ni MILF Civil Military Affairs Chief Eid Kabalu na ‘unfair ‘ umano ito dahil sa tuwing may mangyayaring pambobomba sa Mindanao Region ay palaging ang kanilang grupo ang itinuturong salarin ng security forces.
Ayon kay Kabalu, mas makabubuting tapusin muna ng PNP at AFP ang kanilang imbestigasyon bago ng mga ito tukuyin ang responsable sa insidente.
Sa inisyal na imbestigasyon ng mga awtoridad, may signature ng pasaway na mga rogue Commanders ng MILF ang narekober na bomba na ginamit sa serye ng pagpapasabog.
Sinabi naman ni MILF negotiating panel Chief Mohagher Iqbal na sa tuwing may sasabog na bomba o granada sa Mindanao ay tila Standard Operating Procedure (SOP) na ng AFP at PNP na ituro ang kanilang grupo.
Binigyang diin ng dalawang opisyal ng MILF na wala silang kinalaman sa mga pambobomba.
Ayon sa mga ito, unislamic ang pambobomba at labag ito sa Islam, ang relihiyon ng mga Muslim.
Nitong Disyembre 31 ay niyanig ng pagsabog ang Oval Plaza ng General Santos City na ikinasugat ng 26 katao kabilang ang dalawang pulis.
Samantala nagkaroon rin ng pagsabog ng bomba sa Iligan City, Lanao del Norte noong Disyembre 18 o ilang araw bago mag-Pasko na ikinasawi ng tatlo katao habang 47 pa ang nasugatan. (Joy Cantos)