Kabesa, mag-utol nilikida

NUEVA ECIJA – Tatlo-katao kabilang ang isang barangay chairman ang ini­ulat na napaslang maka­raang ratratin ng mga ‘di-pa kilalang kalalakihan sa bisi­nidad ng Ba­rangay San Fran­cisco sa ba­yan ng Sto. Domingo, Nueva Ecija noong Lunes ng hapon.

Kinilala ng pulisya ang mga biktimang sina Ba­ rangay Chairman Guillermo Bernardo, 48, ABC president ng Sto. Domingo; ex-Ba­rangay Chairman Dionisio Santos, 59; at kapatid nitong si Evangeline de Guzman, 51, pawang mga residente ng Barangay San Francisco.

Kabilang naman sa mga sugatan na ngayon ay nasa Dr. Paulino J. Garcia Memorial Hospital ay sina Celso Aquino, 42, ingat-yaman ng barangay; Louie Florez, 20; at si Adrian Reña, 17.

Base sa police report na nakarating kay P/Senior Supt. Ricardo Marquez, Nueva Ecija police director, lumilitaw na binabantayan ng mga biktima ang pagpa­pagawa ng maliit na chapel nang huminto ang isang kulay asul na Mitsubishi Lan­cer na walang plaka.

Bumaba ang mga kalala­kihang sakay ng kotse at nagsimulang mamamaril sa direksyon ng mga biktima.

May teorya ang pulisya na nadamay lamang sa krimen ang mag-utol na Santos at De Guzman na sinasabing nag-donate ng lupang kinatitirikan ng chapel. Christian Ryan Sta. Ana