Tatlong bihag ang pinatay ng mga bandidong Abu Sayyaf na sumalakay sa Lamitan City, Basilan kahapon ng umaga.
Kinilala ang mga biktima na sina Nonie Sahilon, Cesar Alberto at asawa nitong si Dahlia. Pawang kasapi ng Cafgu Active Auxiliary sina Alberto at Sahilon.
Ayon kay 1st Lt. Steffani Cacho, tagapagsalita ng Armed Forces of the Philippines-Western Mindanao Command, naganap ang insidente dakong alas-6:00 ng umaga sa Brgy. Baguini, Lamitan City.
Batay sa report, sinalakay ng mga bandidong pinamumunuan ng isang Commander Usman ang detachment ng CAFGU sa Sitio Bagueniao, Brgy. Balobo sa nasabing lungsod.
Ang nasabing detachment ay hinarass ng mga bandido matapos itong paulanan ng bala.
Mabilis namang nagresponde ang tropa ng Marine Battalion Landing Team 7 kung saan napilitang magsiatras ang mga bandido na tangay ang tatlong biktima na ginawa ng mga itong kalasag laban sa mga sundalo.
Gayunman, sa kasamaang palad ay pinagbabaril ng mga bandido habang tumatakas sa daan ang tatlong bihag na siya ng mga itong ikinamatay.