5 aircon bus sinunog ng NPA

LINGAYEN, Panga­sinan — Aabot sa limang aircon bus ng Victory Liner ang iniulat na sinunog ng mga rebeldeng New Peo­ple’s Army na ikinasugat ng anim na pulis maka­raang su­miklab ang bakbakan sa loob ng terminal ng bus sa Lin­gayen, Pangasinan ka­ma­ka­lawa ng gabi.

Ayon kay P/Supt. Harris Fama, hepe ng Lingayen PNP, dakong alas-11:40 ng gabi noong Miyerkules nang lumusob ang mga rebelde sa terminal ng na­sabing bus company  sa kahabaan ng Avenida St., Poblacion.

Kabilang sa mga suga­tang pulis na isinugod sa Region 1 Medical Center sa Dagupan City ay sina PO3 Alex de Guzman, PO3 Daniel Sison, PO2 Rey­naldo Domalanta, PO1 Her­man Gamba, PO1 Ramon Valencerina, PO1 Ar­menio Abarabar at ang konduktor ng bus na nag­tamo ng 2nd degree burns dahil natutulog ito sa isa sa limang bus na sinunog.

Base sa police report na nakarating sa Camp Cra­me, dinisarmahan ang gu­wardiya na si Romeo Mer­cullo habang ikinulong naman sa palikuran  ang mga drayber ng bus.

Ilang rebelde ang nag­buhos ng gasolina sa li­mang bus at sinilaban su­balit natiyempuhang ma­pa­daan ang mobile patrol car na sinasakyan ng wa­long pulis at isang sibilyan.

Dito na sumiklab ang umaatikabong bakbakan  sa pagitan ng magkabilang panig habang tuluy-tuloy namang nasunog ang li­mang aircon bus.

Ayon sa ilang testigo, sampung armadong kala­la­kihan ang mabilis na tu­makas sakay ng van at FX.

May teorya si P/Chief Supt. Luizo Ticman, na sangkot sa pangongotong ang mga rebeldeng nag­hasik ng terorismo sa nabanggit na lugar habang aabot naman sa P5 mil­yong ari-arian ang pin­sala. Ce­sar Ramirez at Joy Cantos