Dalawang bomb expert ng Moro Islamic Liberation Front ang iniulat na malubhang nasugatan na nadamay rin ang dalawang sibilyan makaraang sumabog ang bomba na kanilang itatanim sana sa bayan ng Esperanza sa Sultan Kudarat noong Huwebes ng gabi.
Sa report ni P/Chief Supt. Felizardo Serapio Jr., naganap ang insidente bandang alas-7:10 ng gabi sa kahabaan ng highway sa Barangay Saliao.
Napag-alamang isang uri ng improvised explosive device (IED) ang sumabog sa stall ng balut vendor na si Dina Aguacito na nasugatan sa insidente gayundin ang 7-anyos na batang ampon nito na si Clarine Velasco.
Kinilala ng mga awtoridad ang sinasabing may dala ng bomba na sina Mohalidin Singo, 26; at Narrex Guaidel, 32; kapwa naninirahan sa Shariff Aguak, Maguindanao.
Kasalukuyang binabantayan ng mga awtoridad ang pinagdalhan sa dalawa sa Galapate Clinic and Hospital.
Lumilitaw sa imbestigasyon, ang dalawang bomb expert ay lulan ng kulay pulang motorsiklo ( LI 9876) at bumibili ng balut kay Aguacito nang aksidenteng sumabog ng wala sa oras ang dalang bomba.
Narekober naman ng pulisya at ilang tauhan ng Army’s 6th Explosives and Ordnance Division mula sa pinangyarihan ng pagsabog ang 9-volt na battery na ginamit na power ng bomba at shell ng 81mm mortar.
Samantalang naglatag ng checkpoint sa nasabing lugar upang maiwasang maulit pa ang insidente.