Mag-aama kinatay ng houseboy

Isang barangay chairman at dalawa niyang maliit na anak ang pinagtataga at na­patay ng kanilang house­boy nang pakainin ito ng baboy at mabigo itong ma­kabale ng pera sa Batac City, Ilocos Norte, ayon sa ulat ng pulisya kahapon.

Kinilala ni Ilocos Norte Police Provincial Director Senior Supt Roman Felix ang mga biktima na sina Rene Bal­lesteros, ng Baoa West, Batac City; mga anak nitong sina Maureen, 5-anyos, at Eloisa, 4-anyos.

Ayon kay Felix, ang kri­men ay nadiskubre kahapon da­kong alas-8:00 ng umaga. Pinaniniwalaang minasaker ang mag-aama kamakalawa ng gabi.

Gayunman, sa follow-up operation ng pulisya, na­patay nito ang nasukol na suspek na kinilala lamang sa alyas na Rey Delawan, 24 anyos, tubong-Mindanao.

Ang chairman ay nag­tamo ng malalim at mala­laking sugat sa iba’t ibang bahagi ng kanyang katawan partikular na sa ulo at leeg habang ang kanyang anak na si Maureen ay nagtamo rin ng malaking sugat sa noo at sa tiyan sa­mantalang si Eloisa ay nag­tamo naman ng malaki ring sugat sa likod ng ulo.

Sinasabi ng ilang kapit­bahay na posibleng nagta­nim umano ng matinding galit si Rey sa kaniyang amo dahil tumanggi itong bigyan siya ng cash advance para makauwi sa kanyang bayan sa Min­danao.

Lalo itong nagwala nang mabatid na ang ulam na ipinakain sa kaniya ng amo ay baboy pala na pinandi­di­rihan at bawal na bawal sa tradis­yon ng mga Muslim na siyang relihiyon ng suspek.

Kinagabihan, bigla na lamang umanong naghura­men­tado ang nasabing suspect na hindi makausap noong Miyerkules ng hapon at nakatingin sa malayo kung saan kinagabihan ma­tapos itong kumuha ng itak ay pinagtataga ang amo at idinamay pati mga bata na ’di pa nakuntento ay pinag­sasaksak pa ang mga ito.

Ang suspek ay ilang buwan pa lamang nagtatra­baho sa tahanan ni Balles­teros. Ang misis ng opisyal ay nagtatrabaho sa Hong Kong.

Narekober naman sa crime scene ang duguang itak at kutsilyo na ginamit sa pagmasaker sa mag-aama.

Ayon kay Felix, si Delawan na taga-Esperanza, Agusan del Sur ay binaril ng mga aw­toridad kahapon matapos mang-“hostage” ng isang bata sa Brgy. Baligat ng lung­­sod   habang papatakas.

Ilang oras matapos ma­dis­kubre ang krimen ay nasukol ng mga awtoridad si Delawan sa Sitio Cuatro sa Barangay Baligat ng lung­sod subali’t nag­tatakbo ito at nambihag ng bata bunsod upang paputu­kan ito ng arresting team ng pulisya.

Una nang naglaan ng P10,000 reward si Association of Brgy. Captains President James Paul Goron Nalupta sa ikadarakip ng nasabing suspek.

Narekober naman ng mga awtoridad kay Delawan na nasawi sa tatlong tama ng bala sa katawan ang isang kutsilyo.