Umaabot sa 18 kawal ni Moro Islamic Liberation Front Commander Ameril Ombra Kato, ang iniulat na napaslang sa loob lamang ng tatlong araw na sagupaan sa tatlong bayan ng Maguindanao, ayon sa ulat kahapon.
Sa phone interview, ito ang kinumpirma kahapon ni Col. Marlou Salazar, Commander ng Army’s 601st Brigade sa phone interview.
“It’s the group of Commander Kato, were engaging in a battle near Liguasan Marsh area, they suffered heavy casualties in the fighting,” pahayag ni Salazar.
Si Commander Kato ay wanted sa batas at may patong sa ulo na P10 milyon dahil sa pananakop ng 15 barangay sa 7-bayan sa North Cotabato noong unang bahagi ng Agosto 2008.
Kabilang sa mga napatay na tauhan ni Commander Kato ay sina Tatukan Babawi, Pahad Faisal, Nasrudin Faisal, Muslimen Tiyaw, Montato Abu Haider Sulaiman at ang iba ay pawang inaalam pa ang pagkakakilanlan.
Sa pitong oras na bakbakan ng 64th Infantry Battalion at 105th Base Command ng MILF sa kagubatan ng Sitio Gawang, Barangay Daplawan sa bayan ng Datu Saudi Ampatuan ay siyam na rebeldeng MILF ang napaslang.
Pitong MILF rebs naman ang napaslang sa pagpapakawala ng militar ng artillery fire sa magubat na bahagi ng Barangay Tee sa bayan ng Datu Piang sa Maguindanao noong Martes ng umaga.
Samantala, dalawa pang MILF renegades ang napaslang sa bahagi naman ng Barangay Muslim, Datu Piang. Sinabi pa ng opisyal na narekober ng militar ang siyam na bangkay ng mga kalaban habang ang iba pa base sa kanilang intelligence report ay binitbit sa kanilang pagtakas.
Kaugnay nito, bandang alas-8:30 naman kahapon ay nakasagupa ng Army’s 40th Infantry Battalion (IB) ang mga MILF renegades kaya muling sumiklab ang giyera sa bahagi ng Brgy. Dunguan, Aleosan, North Cotabato.