CAMP AGUINALDO – Nakubkob ng tropa ng militar ang isa pang training camp ng Moro Islamic Liberation Front (MILF) renegades sa patuloy na opensiba sa Barangay Guitapo, Datu Saudi Ampatuan, Maguindanao, ayon sa opisyal kahapon.
Ayon kay AFP-Eastmincom Spokesman Major Armand Rico, nakubkob ng mga sundalo ng Army’s 63rd Division Reconnaissance Company ang training camp ng MILF renegades sa bahagi ng Barangay Modia, Datu Saudi Ampatuan.
“Kahit nag-umpisa na ang Ramadan kahapon ay hindi kami titigil sa opensiba laban sa grupo ni Kato,” pahayag ni Rico.
Aminado naman si Rico na magkakaroon lamang ng pagbabago ng taktika laban sa operasyon sa MILF renegades sa panahon ng Ramadan na oobserbahan ng mga Muslim sa loob ng isang buwan.
Sa kasalukuyan ay patuloy ang operasyon ng militar laban sa grupo ni Kato na nagpapalipat-lipat ng taguan sa Maguindanao. (Joy Cantos)