August 20, 2008 | 12:00am
LEGAZPI CITY – Tinambangan at napatay ang retiradong sarhento ng Phil. Army ng mga armadong kalalakihan na pinaniniwalaang mga rebeldeng New People’s Army sa oval ng Provincial Sport Complex sa Barangay San Francisco, Guinobatan, Albay kahapon ng umaga. Labindalawang bala ng baril ang tumapos sa buhay ni ret. Army Sgt. Rolando Molina ng Barangay Calzada ng nabanggit na bayan. Sa police report, lumilitaw na nagja-jogging ang biktima sa nasabing lugar nang lapitan at ratratin. Ed Casulla
Lola dinedo ng 2 senglot
BATAAN – Maging ang isang 61-anyos na lola ay biktima ng brutal na karahasan kung saan pinagsasaksak hanggang sa mapatay ng dalawang senglot na lalaki kamakalawa ng gabi sa Barangay Doña Orani, Orani, Bataan. Apatnapung saksak sa katawan ang tumapos sa buhay ni Nenita De Jesus y Cruz, samantalang kinasuhan matapos masakote ang mga suspek na sina Marvin Bacani y Palad, 21 at Edgardo Mendogorin y Arcenas, 18, kapwa kapitbahay ng biktima. Sina Bacani at Mendogorin ay nakorner ng mga tauhan ni P/Senior Insp. Jeremias Dayo sa bisinidad ng Barangay Bangal, Dinalupihan. Sa pagsisiyasat ng pulisya, lumitaw na napagtripang pasukin ng mga suspek ang bahay ng biktima na nagkataon namang natutulog ang matanda. Jonie Capalaran
2 ‘sinalvage’ sa Cavite
CAVITE – Pinahirapan muna bago pinagbabaril hanggang sa mapatay ang dalawang kababaihan saka itinapon sa bisinidad ng Barangay Sta. Lucia sa bayan ng Dasmariñas, Cavite kahapon ng madaling-araw. Kasalukuyang bineberipika ang pagkikilanlan ng mga biktimang kapwa may tama ng bala sa ulo, nasa edad na 25 hanggang 30-anyos at may taas na 5 talampakan. Ayon kay PO3 Edgar Belza, wala naman nakasaksi sa naganap na pamaslang kung saan sunud-sunod na putok ng baril ang naulinigan ng ilang residente bago matagpuan ang dalawa. May teorya ang pulisya na may kaugnayan sa bawal na gamot ang pamamaslang laban sa mga biktima. Cristina Timbang
