Binurdahan ng saksak hanggang sa mapaslang ng isang mister ang 39-anyos na lalaking hinihinala niyang kalaguyo ng kaniyang misis sa Escalante City, Negros Occidental kamakalawa.
Idineklarang dead-on-arrival sa Escalante City Hospital ang biktimang si Nestor Silvano ng Sitio Amalia, Barangay Hunob-hunob ng lungsod matapos na magtamo ng malalim na tama ng saksak sa dibdib.
Kasalukuyan namang humihimas ng rehas na bakal matapos masakote ng Escalante City Police ang suspek na si Aaron Francisco, 54, residente ng Sitio Katagbakan, Barangay San Isidro, Toboso, Negros Occidental.
Batay sa report na nakarating kahapon sa Camp Crame, naganap ang insidente pasado alas-7:00 ng gabi matapos abangan ng suspek ang biktima.
Bigla na lamang umanong sinaksak ng suspek ng patalim ang biktima na nagtamo ng dalawang malalalim na saksak sa dibdib pagkaraang matiyempuhan itong pababa sa tricycle.
Lumilitaw sa inisyal na imbestigasyon na matagal nang may galit ang suspek sa biktima na nabalitaan niyang may relasyon sa kanyang asawa. (Joy Cantos)