ANTIPOLO CITY — Naging palaisipan sa mga imbestigador ng pulisya ang pagkamatay ng isang 19-anyos na estudyante ng University of the Phils. (UP) makaraang matagpuan itong nasa ilalim ng Mitsubishi Pajero na nakaparada sa harap ng kanilang bahay sa Coger Village, Antipolo City, Rizal kahapon ng umaga.
Sa ulat ni P/Senior Insp. Rhonie Ariola, hepe ng PCP2, isa sa anggulong sinisilip ng pulisya ay sinadya ang pagkamatay ng biktimang si Ma. Lourdes Pagauitan matapos madiskubre ng kanyang mga kaanak ang bangkay nito sa ilalim ng pag-aaring Pajero (NGO-356). Sa inisyal na imbestigasyon, lumilitaw na posibleng naatrasan ng sariling sasakyan ang biktima dahil sa mga bakas ng gulong sa katawan nito. Kasalukuyang inaalam ng pulisya kung may kasama at saan nanggaling ang biktima bago matagpuan ang bangkay nito. Edwin Balasa