KIDAPAWAN CITY – Dasal ang hiling ngayon ng mga opisyal at miyembro ng Mindanao Peoples’ Caucus, isa sa pinakamalaking grupo ng mga peace advocates sa Mindanao, para mapalaya sa lalong madaling panahon ang kanilang chairman na dinukot ng mga bandidong Abu Sayyaf Group kahapon sa bayan ng Maimbung, Sulu.
Sa pahayag ni Atty. Mary Ann Arnado, executive director ng Initiatives for International Dialogue (IID) at isa sa mga convener ng MPC, magsasama-sama ang mga peace advocates para sa inter-faith prayer sa campus ng Ateneo sa Davao City.
Dasal ng mga peace advocates na mapalaya nang walang kondisyon si MPC Chairman Prof. Octavio Dinampo ng Mindanao State University.
Maliban kay Dinampo, kasa ma ring dinukot ng Abu Sayyaf Group ang tatlong ABS-CBN news personality na sina Ces Drilon at dalawang cameraman kabilang na si Jimmy Encarnacion.
Ang pagdukot ay kinumpirma mismo ni P/Chief Supt. Joel Goltiao, police director ng Autonomous Region in Muslim Mindanao (ARMM).
Naganap ang pagdukot bandang alas-11 ng umaga sa bisinidad ng Sitio Kulasi, sa bayan ng Maimbung.
Ito na ang ikalawang pagkakataon na may kinidnap na reporter ng ABS-CBN sa Sulu.
Matatandaang kinidnap ng Abu Sayyaf ang ABS-CBN reporter na si Maan Macapagal at cameraman nitong si Val Cuenca. Malu Manar