CEBU CITY – Niratrat at napatay ng mga armadong kalalakihan ang isang agent ng Philippine Drug Enforcement Agency-7 sa kahabaan ng Basak Road sa Barangay Basak, Lapulapu City noong Biyernes na gabi.
Sa ulat ni SPO2 Rolito Jumaoas ng Lapulapu City PNP, napuruhan sa leeg at ulo ang biktimang si Fire Officer 3 Prescillano Gingoyon, Jr.
Naaresto naman ng pulisya ang dalawang suspek na sina Michael Baclohan, 26, ng Sitio Colo, Barangay Pajac at Romulo “Amay” Soronio, 38, ng Barangay Bangkal, Lapulapu City.
Si Soronio ay sumuko matapos na malamang isinasangkot ang kanyang pangalan sa krimen bagaman inamin nitong minsan na silang nagkagalit ni Gingoyon, habang si Baclohan naman ay dinakip sa pangunguna nina P/ Senior Insp. Condrado Manatad; P/Supt. Rex Derilo at Randy Pedroso ng PDEA-7.
Ang biktima na nasugatan ang kasamang si Paner Cacha ay tinambangan habang sakay ng kotse papauwi sa nabanggit na barangay. Pinasinungalingan naman ng mga suspek ang mga akusasyon ng pulisya subalit pormal pa rin silang kakasuhan. Edwin Ian Melecio at Joy Cantos