BATANGAS – Isang 36-anyos na barangay captain ang nakaligtas sa tiyak na kamatayan makaraang tambangan ng mga ‘di-pa kilalang kalalakihan sa Narrat Street, Mt. View Subd, Poblacion 3, Tanaunan City, Batangas noong Lunes ng umaga.
Kinilala ni P/Senior Supt. David Quimio, Batangas police director, ang biktimang si Chairman Macario “Mike” Galicia ng Barangay Pantay Matanda.
Ayon sa ulat, katatapos lang dumalo ni Galicia sa flag raising ceremony sa City Hall nang ratratin habang sakay ng Toyota Corolla (UFS-703).
Isinugod si Galicia sa Daniel Mercado Medical Center pero inilipat din sa Mary Mediatrix Hospital sa Lipa City matapos magtamo ng mga tama ng bala sa ibat-ibang bahagi ng kanyang katawan. Inaalam pa rin ng mga awtoridad ang motibo ng krimen. (Arnell Ozaeta)