10 bata nalason

Sampung bata ang napaulat na isinugod sa Western Visayas Regional Hospital makaraang malason sa kinaing bunga ng tuba-tuba sa Bacolod City, Negros Occidental kamakalawa.

Sa ulat na nakarating sa Camp Crame, kinilala ang mga biktima na sina  Lorelie Garilva,  Jun Nono,  Joven Basco na pawang 13-anyos; Agustin Señeres, 15; Ian Basco at Jomel Pesuro na kapwa 11-anyos; Giovani Señeres, Dionisio Togle na kapwa 12-anyos; Charles Villarit, 7 at si Jimmy Togle, 3.

Napag-alamang namitas ng bunga ng tuba-tuba ang mga biktima sa compound ng Kansilayan Elementary School bandang alas-2 ng hapon.

Gayon pa man, makalipas ang ilang minuto ay nakaranas ng pagkahilo, pananakit ng tiyan, ulo,  pagtatae at labis na pagsusuka ang mga biktima.

Bunga nito ay nag-panic ang mga magulang kaya isinugod ang mga bata sa nabanggit na ospital. (Joy Cantos)