Isang Pastor ng Born-Again Christian ang iniulat na napaslang makaraang pagtatagain ng isang lalaki na nag-amok sa loob ng maliit na simbahan sa Barangay Bina sa bayang ng Maasin, Iloilo kamakalawa ng gabi.
Naisugod pa sa Ramon Tabiana Memorial District Hospital subalit idineklarang patay ang pastor na si Armando Corio ng Cabatuan, Iloilo.
Tugis naman ng pulisya ang suspek na si Rizalde Cordero ng nabanggit na barangay. Sa ulat na nakarating sa Camp Crame, dakong alas-10 ng gabi nang maganap ang insidente kung saan nagtitipon sa loob ng simbahan ang mga miyembro ng Born Again Christian para sa pagsisimula ng church service nang pumasok ang suspek na may hawak na matalim na itak.
Napag-alamang nanlilisik ang mga mata nang sugurin at pagtatagain ng suspek ang nasabing Pastor na ayon dito ay isa umanong masamang espiritu.
Sa matinding takot ay nagpulasan naman palabas ng simbahan ang mga miyembro ng nasabing relihiyon na agad inireport sa pulisya ang insidente.