CAMP VICENTE LIM, Laguna – Isang 48-anyos na negosyante ang iniulat na namatay samantalang umaabot naman sa 20 iba pa ang nasugatan makaraang mahulog ang sinasakyang pampasaherong jeep sa banging sakop ng Barangay San Nicolas sa bayan ng Magsaysay, Occidental Mindoro kahapon ng umaga.
Kinilala ni P/Senior Supt. Audie Arroyo, provincial police director, ang nasawing biktima na si Danny Mauricio ng Jaen, Nueva Ecija. Apat sa mga biktimang nasaktan ay sina Norma Mata, Bonbon Castillo ng Barangay Kaninawit; Romeo Villaverde at Amjag Rana, isang Pakistani. Ayon kay PO2 Leopoldo Quiloy, overloaded ang jeepney (VBE-624) na patungong Magsaysay mula sa bayan ng Bulalakaw nang mawalan ng control sa manibela ng drayber dumausdos sa bangin bandang alas-10 ng umaga- Mabilis namang tumakas ang hindi pa nakikilalang drayber matapos ang aksidente samantalang nangako naman ang may-ari ng jeepney na tutulong sa mga nasaktan at sa pamilya ng nasawing pasahero. (Arnell Ozaeta)