CAMP CRAME – Pinaniniwalaang pinag-aawayang kuwintas ang isa sa motibo kaya sinaksak sa leeg ng kapatid na lalaki ng kaniyang dalagitang boarder ang dating sikat na World Boxing Champion sa superfeatherweight na si Rolando Navarette kamakalawa ng gabi sa Barangay Bula, General Santos City. Kasalukuyang ginagamot sa Saint Elizabeth Hospital si Navarette sanhi ng sugat ng patalim sa leeg. Bago ang insidente, nagpa-blotter pa sa presinto si Navarette laban sa kaniyang boarder na si Lily Saliling, dahil hindi nito isinauli ang kuwintas na hiniram. Napag-alaman sa ulat ng pulisya na nakarating sa Camp Crame, hindi tumupad sa usapan ang dalagita na ibalik ang kuwintas noong Enero kayat nagalit si Navarette at nasampal ang ina ni Saliling. Nagalit naman ang kuya ng dalagita at nang nakasalubong si Navarette ay bigla nitong sinaksak sa leeg. Dahil sa sorpresang pag-atake ng suspek na si Racman Saliling ay nabigo ang dating kampeon na ipagtanggol ang sarili. (Joy Cantos)