CAMP VICENTE LIM, Laguna – Dalawa-katao kabilang na ang mister ng vice mayor sa bayan ng El Nido, Palawan ang iniulat na nasugatan makaraang makipagbarilan sa dalawang sundalo noong Huwebes ng gabi sa Barangay Villa Libertad sa nabanggit na bayan.
Kinilala ni P/Senior Inspector Silverio Bacsa, El Nido police chief, ang mga sugatang sina Michael Sabaupan at Rudy Lim, ang asawa ni El Nido Vice Mayor Edna Lim.
Ayon kay Bacsa, rumesponde sina S/Sgt. Ruben Natulan at S/Sgt. Renato Managay ng Task Force Malampaya matapos makarinig ng mga putok ng baril sa bahagi ng farm house nina Vice Mayor Lim sa nasabing barangay bandang alas-9:45 ng gabi.
Sa ibinigay na salaysay ng dalawang sundalo sa pulisya, habang papunta sila sa farm house ng pamilya Lim para usisain ang putukan, nang bigla na lang salubungin ng mga putok ng baril para magbunsod na gumanti sila ng putok.
Dahil doon, tinamaan ng bala ng baril si Sabaupan sa tiyan samantala, nadaplisan naman ng bala ng baril ang tiyan ni Lim.
Iniimbestigahan pa rin ng pulisya ang insidente para matukoy kung sino ang responsable sa insidente. (Arnell Ozaeta)