Life hatol sa 4 na pulis

Batangas City – Apat na pulis ang hinatulan ng parusang habambuhay na pagkakabilanggo dahil sa pagpatay sa isang preso sa Calaca, Batangas.

Sa 53-pahinang desis­yon na ipinalabas ni Judge Cecille Austria ng Regional Trial Court Branch 2 ng Balayan, Batangas, na­sentensyahan  sina SPO1 Rolando Formento, SPO2 Lorente Pornillosa, SPO4 Bonifacio Villanueva at PO3 Reynaldo Malimban na pawang dating naka­talaga sa Calaca Police Station.

Ayon kay Austria, ang apat na pulis ay sangkot sa pagpatay sa bilang­gong si Raul Vidal ma­tapos umano itong bug­bugin habang nasa loob ng kanyang selda sa Calaca Police Station noong March 3, 1998.

Subalit bago pa maila­bas ang sentensya sa apat na akusado, namatay na si Pornillosa sa sakit na cancer samantalang nag­pa­kamatay naman umano sa loob ng selda si Villa­nueva.

Nakatakas naman si Malimban sa kanyang ku­lungan matapos lagariin nito ang kandado at rehas ng kanyang selda at lumu­sot sa bintana ng comfort room noong Miyerkules ng madaling-araw.

Tanging si Formento ang binasahan ng sen­tensya habang ginawaran naman ni Judge Austria ang pamilya ni Vidal ng P2-million para sa danyos mula sa mga suspek. (Arnell  Ozaeta)