LEGAZPI CITY — Isang Disc Jockey ng isang FM station sa lungsod na ito ang nasa malubhang kalagayan sa Aquinas Hospital matapos saksakin ng suspek na nagmamasahe sa kanya sa loob ng kanyang bahay kamakalawa ng gabi sa Teachers Village, Phase 1, Barangay 16, sa lungsod na ito.
Nakilala ang biktima na si Richard Bartolata, 41, aka DJ Brown, binata, DJ sa DWRZ FM.
Mabilis namang nakatakas ang suspek na si Dexter Cradel 21, binata at residente ng Barangay Arimbay ng lungsod na ito.
Ayon sa pulisya, ang insidente ay naganap dakong alas-9:30 ng gabi nang ang suspek ay nagtungo sa bahay ng biktima upang masahihin ito.
Minamasahe ng suspek ang biktima nang bigla niyang tarakan ito ng kutsilyo sa katawan.
Napag-alaman na bago pa man dumating ang kapatid ng biktima ay mabilis na tumakas ang suspek. (Ed Casulla)