BAGUIO CITY – Isang mister na nagselos sa kanyang asawa ang sinunog ang kanyang sariling bahay na ikinamatay ng ginang kahapon ng madaling-araw sa Barangay Balacbac dito sa siyudad.
Kinilala ni Fire Insp. Jovencio Marquez, acting city fire marshall, ng Baguio City Fire Station, ang biktimang si Chique Dularte, 27, samantalang ang suspek ay si Edwin Dularte, 32, isang taxi drayber.
Naganap ang sunog sa pagitan ng alas-4:30 hanggang alas 5:00 ng umaga.
Lumitaw sa imbestigasyon, bago maganap ang insidente ay nagkaroon ng pagdiriwang sa kaarawan ng isa sa mga anak ng mag-asawang Dularte at matapos ay nagkaroon umano ng pagtatalo ang mag-asawa, ukol sa pagseselos umano ng lalaki.
Ayon kay Marquez, nabanggit umano ng kanilang anak na si Mark, 6, na nakita nito ang suspek nang umagang iyon na may hawak na bote at ang laman nito ay ibinuhos sa sahig at saka sinindihan.
Sa tulong ng mga kapitbahay ay nailigtas ang tatlong bata at ang suspek subalit ang biktima na nasa kasarapan ng tulog sa kuwarto ay nadatnan na lamang ng mga bumbero na sunog na. Masusing inaalam ngayon ng mga arson investigator kung sinadyang sinunog ng suspek ang kanilang sariling bahay na nagkakahalagang P1 milyon.