Killer drayber nakapatay uli

ORMOC CITY – Naka­patay na naman uli ng isang lalaki ang drayber ng truck na naunang kumitil ng buhay ng anim-katao sa national highway sa Ba­rangay Ipil noong 2006, maka­raang salpukin nito ang mo­torsiklo sa highway na sakop naman ng Ba­rangay Cogon noong Bi­yernes ng gabi.

Kinilala ni Traffic chief P/Insp. Joseywells Estopen, ang namatay na si Roldan Esmane y Lunzaga, 32, may asawa, ng Barangay San Isidro at kawani ng Ormoc waterworks.

Nadamay din sa sakuna ang pasahero ng traysikel na si Charity Parrilla ng Brgy. San Pablo.

Nakakulong naman at kina­suhan ang drayber ng truck na si Elias Pedra y Anonat, 36, may asawa, at residente ng Brgy. Masu­mang, Merida, Leyte.

Ayon kay Estopen, pa­tungo ang truck (GEE-972) ng suspek sa Barangay Tongonan para mag-deliver ng cargo sa Phil. National Oil Co. nang masal­pok ang motorsiklo ng biktima.

Napag-alamang nag-overtake ang truck para lampasan ang traysikel ni Ronilo Brigildo nang ma­kasalubong ang motor­siklo (HQ-3132) ni Esmane.

Ayon sa pulisya, su­sunduin sana ni Esmane ang kanyang misis sa entertainment parlor para magdaos ng selebrasyon matapos makatanggap ng bonus nang maganap ang tra­hedya.

Nabatid din ng pulisya na ang ama ng biktima ay kalilibing pa lamang at may limang araw pa lang ang nakalipas.

Sinabi ni Pedra sa mga rumes­pondeng pulis, mi­nabu­ti n’yang salpukin ang mo­torsiklo ni Esmane kaysa sa traysikel na walo ang pasahero

Base sa rekord ng pu­lisya, noong Hunyo 2006, si Pedra na nasa implu­wen­sya ng alak na nag­mama­neho rin ng truck patungo sa Baybay City, nang ma­sangkot sa sal­pukan ng traysikel na iki­nasawi ng anim-katao.

Kasalukuyan pang nasa Ormoc City Police Office ang truck at pansa­man­talang naka­lalaya si Pedra matapos ma­ka­pagpiyansa sa kasong 7 counts ng kasong reckless imprudence resulting to homicide. Roberto C. Dejon