Nene ginahasa bago pinaslang

Malagim ang sinapit ng isang limang taong gulang na ba­ tang babae na napaulat na nawawala noong Huwebes matapos na gahasain muna bago paslangin saka itinapon ang bangkay  ng ‘di pa nakilalang salarin sa isang bakanteng lote sa Lucena City  kamakalawa.

Ang bangkay ng biktima na itinago sa pangalang Princess ay natagpuan ng isang magsasaka na kinilalang si Ignacio Moreno, residente ng Zaballero Subdivision sa Brgy. Gulang-Gulang ng lungsod.

Base sa pahayag ni Moreno sa Lucena City Police, nag-aayos siya sa kaniyang taniman ng gulay  malapit sa isang sapa ng lungsod noong Biyernes ng umaga nang madiskubre ang bangkay ng biktima.

Sa isinagawang inisyal na imbestigasyon ng nagres­pondeng mga elemento ng Scene of the Crime Operatives team, kinakitaan ng palatandaan na si Princess ay dumanas ng panga-abusong sekswal bago pinaslang. Hindi naman natukoy kung paano pinaslang ang paslit.

Nabatid na ang biktima ay  nawawala noon pang Huwebes matapos itong magpaalam para maglaro pero hanggang gumabi ay nabigo ng makauwi sa kanilang tahanan.

Kaugnay nito, isinailalim na sa awtopsya ng mga awtoridad ang bangkay ng biktima.

Patuloy namang nagsasagawa ng imbestigasyon ang mga awtoridad upang maaresto ang rapist-killer ng bik­tima. (Joy Cantos at Tony Sandoval)