CAMP CRAME – Kalaboso ang binagsakan ng isang dating barangay chairman sa bigong pagtatangka na iligpit ang isang alkalde na nagresulta rin sa pagkasugat ng apat-kataong binaril nito kabilang ang dalawang pulis sa bayan ng Maragondon, Cavite may ilang araw na ang nakalipas.
Pormal naman kinasuhan ng pulisya ang suspek na si Eliseo Pineda ng Barangay Pacheco, Magallanes kung saan nakumpiskahan ng isang sniper AK47 assault rifle matapos na pasukin ang compound ng bahay ni Maragondon Mayor Monte Andaman, ang sinasabing target nitong itumba.
Kabilang naman sa nasugatan dahil sa tama ng bala ay sina P/Insp. Sajid Butac, deputy chief ng Maragondon PNP, SPO1 Reynaldo Beltran, Xavier Angeles, 5; at ang traysikel drayber na si Larry Kasama. Napag-alamang napigilan ng mga secuirty aide ng alkalde ang pagpasok sa nasabing compound ng suspek na may bitbit na baril.
Kaagad naman rumesponde ang mga pulis para arestuhin ang suspek subalit nakatakbo ito bago nagpaputok ng baril kaya tinamaan ang mga biktima.
May teorya ang pulisya na hired killer si Pineda dahil may binabanggit na mga pangalan ng pulitiko subalit wala pang kongkretong ebidensya. Joy Cantos