Lider ng holdaper dedo sa shootout

CAMP CRAME — Napatay sa shootout ang isang lider ng notoryus na robbery/holdup gang habang isa pa ang nasa­kote sa Barangay Marga sa bayan ng Tubod, Surigao del Norte, ayon sa ulat kahapon.

Kinilala ang napatay na si Henry Tulero Medeja, tubong Misamis Occidental at may nakabimbing warrant of arrest sa kasong  murder at itinutu­rong lider ng notoryus  na Ma­yordo Gang na kaalyado ng Kuratong Baleleng Group.

Arestado naman ang kasa­mahan na si Rodulfo Ulpindo Cortes ng Barangay Liloan ng nabanggit na bayan.

Sa naantalang ulat na ti­nanggap kahapon ni PNP Chief Director General Avelino Razon Jr., naharang ng mga awtoridad sa pangunguna ni PO2 Zosimo Torrecampo Jr. ang mga suspek lulan ng motorsiklo.

Sa halip na huminto ay pi­na­harurot pa ang motor­siklo at nagpaputok kaya gu­manti ang pulisya.

Nagawa pang makapag­tago ng mga suspek sa bahay na pag-aari ng pamilya Maca­lolot subalit naaresto si Cortes habang nakipagbarilan naman si Medeja sa pulisya.

Tumagal ng halos dala­wang oras ang palitan ng putok hanggang sa magawang ma­pasok ng mga pulis ang bahay at nakita ang duguang bang­kay ni Medeja sa loob ng banyo. Joy Cantos