CAMP AGUINALDO — Trahedya ang sumalubong sa magkakaibigang estudyante ng Dagupan Maritime School makaraang malunod ang dalawa sa mga ito habang tumatawid sa ilog na pinaniniwalaang mga lango sa alak kamakalawa ng hapon sa Barangay Tambac, Dagupan City, Pangasinan. Kabilang sa magkaibigang nasawi ay sina Michael Jesus Gambay ng Alaminos, Pangasinan at Sherwin Alvarez ng Nueva Ecija, samantala, nakaligtas naman si Jericho Baysec. Napag-alamang nag-iinuman ng alak ang tatlo nang nagkasu ndong bumalik na sa boarding house ni Baysec na nasa kabilang pampang ng ilog. Habang tumatawid sa ilog ay biglang nawala ang dalawa hanggang sa lumutang ang bangkay ni Gambay dakong alas-2 na ng madaling-araw kahapon, habang pinaghahanap pa rin ang bangkay naman ni Alvarez. Pinaniniwalaan namang sa sobrang kalasingan ay hindi na nagawang makalangoy ng dalawang biktima. Joy Cantos
Mag-utol inatado ng adik
CAMARINES NORTE — Nasa malubhang kalagayan ang mag-utol na batang lalaki makaraang pagsasaksakin ng isang adik sa droga na animo’y sinapian ng masamang espiritu sa naganap na insidente sa Barangay Bagasbas sa bayan ng Daet, Camarines Norte kamakalawa ng umaga. Kasalukuyang ginagamot sa Camarines Norte Provincial Hospital ang mag-utol na sina Joseph, 9; at Jonard Estrella, kapwa kapitbahay ng suspek na si Joseph Sayno, 27, ng Purok 3 ng nabanggit na barangay. Ayon sa pulisya, naglalaro ang mag-utol nang lapitan at pagsasaksakin ng suspek sa labas ng bakuran ng kanilang bahay. Nasakote naman ng mga opisyal ng barangay ang suspek at dinala sa himpilan ng pulisya para sa kaukulang imbestigasyon. Francis Elevado
7-anyos minolestiya ng lolo
RIZAL — Rehas na bakal ang binagsakan ng isang 65-anyos na lolo makaraang arestuhin ng pulisya sa kasong panghahalay ng isang 7-anyos na babae sa loob ng kanyang bahay sa Antipolo City, Rizal kamakalawa ng gabi. Pormal na kinasuhan ng pulisya, ang suspek na si Eduardo Cunana, alyas Lolo Eddie, habang nagreklamo naman ang ina ng biktima sa himpilan ng pulisya kaya nasakote ang matanda. Sa ulat ni P01 Ana Marie Francisco, pinaunlakan naman ng biktima ang paanyaya ng suspek na tumungo sa bahay para kunin ang mga gulay at prutas. Subalit ginawan ito ng kahalayan ng suspek na naaktuhan naman ng ina ng bata. Agad na humingi ng tulong ang ina ng bata para masakote ang matanda. Edwin Balasa