CAMP AGUINALDO – Pinagbabaril hanggang sa mapatay ang presidente ng Association of Barangay Chairman na kakandidato muli sa Oktubre sa naganap na panibagong karahasan sa harapan ng Hall of Justice sa Danao City, Cebu noong Biyernes.
Napuruhan sa ulo si Cresencio Estrera, 55, chairman ng Brgy. Sta. Cruz, San Francisco, Camotes Island, Cebu.
Napag-alamang kalalabas lamang sa Danao City Hall of Justice ng biktima kasama ang dalawa nitong anak kaugnay sa kaso na nililitis at hinihintay ang dalawa nitong kapatid na sina Eusebio at Pepito na pinaghanap nito ng pump boat para maghatid sa kanila sa San Francisco, Camotes Island nang lapitan at ratratin ng maskaradong lalaki.
Duguang bumulagta ang biktima habang mabilis namang lumayo ang killer sakay ng kulay pulang motorsiklo patungo sa direksyon ng bayan ng Carmen.
Sa teorya ng mga imbestigador ng pulisya, na paghihiganti ang isa sa motibo ng krimen dahil may kasong murder na kinakaharap sa korte ang biktima at dalawa nitong kapatid.
Kasalukuyan namang iniimbestigahan ang iba pang anggulo sa naganap na krimen. (Joy Cantos)