76 sugarol nasakote

CAMP CRAME — Umaabot sa 76 sugarol ang iniulat na nasakote ng Anti-Gambling Task Force at ng lokal na pulisya sa isinagawang serye ng pagsalakay sa mga bahay-sugalan sa Baguio City, ayon sa ulat kahapon. Sa report, kabilang sa sinalakay at naipasara ay ang mini-casino sa ikalawang palapag ng dating Garder Theater sa kahabaan ng Dagohoy St. ng naturang lungsod. Sinabi ng raiding team na ang lugar ay isang organisadong gambling site na matagal na nilang isinasailalim sa surveillance operations. Nasamsam naman ng raiding team ang iba’t ibang uri gambling paraphernalia tulad ng salisi tables, mote, playing cards, colored chips, dalawang patalim at isang baril. Pormal naman kinasuhan ang may-ari ng nasabing gusali dahil sa pagpapahintulot nito na makapagsagawa ng  operasyon ang illegal na pasugalan. Patuloy naman ang crackdown operations ng awtoridad laban sa illegal gambling. Joy Cantos

Mister nag-amok sa selos

COTABATO CITY  —  Isang sibilyan ang kumpirmadong napatay habang dalawa naman ang nasugatan matapos mag-amok ang isang mister dahil sa matinding selos sa sariling misis sa Barangay Dinaig sa bayan ng Datu Odin Sinsuat, Shariff Kabungsuwan, noong Huwebes ng gabi. Kinilala ni P/Senior Insp. Fatima Malao, hepe ng Datu Odin Sinsuat PNP, ang napatay na si Amir Kusain. Sumuko naman ang suspek na si Guiamel Kiram, matapos na maubusan ng bala sa paki­kipagbarilan sa mga rumespondeng pulis. Si Kusain ay inakusahan ng suspek na kalaguyo ng kanyang misis kaya niya binaril ng shotgun. Di pa nakuntento ang suspek ay pinagtataga pa nito ang kanyang bayaw, tiyuhin at hinostage pa ang sariling ina na si Asha Kiram, kapatid na si Sahara Maulana at dalawang pamangkin na menor-de-edad. Nang sumuko ay halos ’di-na makausap nang matino ang suspect na pinaniniwalaang lango sa bawal na gamot. Malu Manar

Ispiya ng AFP dinedo sa gulpi

LEGAZPI CITY — Brutal na kamatayan ang sinapit ng isang 26-anyos na lalaki na pinaniniwalaang espiya ng militar matapos na dukutin at pahirapan ng mga rebeldeng New People’s Army sa bayan ng Sallapadan, Albay noong Miyer­kules ng hapon. Ang bangkay ng biktima na natagpuan ng ilang magsasaka na inabandona sa bahagi ng nabanggit na bayan ay nakilalang si Ulysis Dapat. Sa ulat, ang biktima ay napaulat na may dalawang araw nang nawawala at ayon sa mga kaanak ay tinangay ng mga rebelde  mula sa kubo nito saka dinala patungo sa katimugang direksyon ng nasabing lugar. Lumilitaw sa imbestigasyon na pinaluhod ng mga rebelde ang biktima saka dinos-por-dos sa leeg at likurang bahagi ng ulo kaya namatay. May teorya naman ang pulisya na inakusahan ng mga rebelde na pagbibigay ng impor­masyon ang biktima sa tropa ng militar hinggil sa aktibidades ng mga mangingikil na rebelde. Ed Casulla

Trike bumaliktad, 14 sugatan

CAMP CRAME — Labing-apat na estudyante mula sa Bannawag Integrated School ang nasugatan matapos na bumaliktad ang traysikel na kanilang sinasakyan sa pa­kurbadang highway sa bayan ng Diffun, Quirino, ayon sa ulat kahapon. Sa report, pito sa mga biktima kabilang sina Reynaldo Alviar, Aileen Cabatbat at Andie Facun ay naisugod sa iba’t ibang ospital. Naitala ang sakuna kamakalawa bandang alas-6 ng umaga habang ang mga estudyante ay lulan ng traysikel na pinaniniwalaang overloading kaya bumaliktad ng traysikel pagsapit sa pakurbadang daang-bayan. Matapos ang sakuna, karamihan sa mga biktima ay nahilo at nagsuka. Joy Cantos