PDEA agent, isa pa tiklo sa buy-bust

CAMP VICENTE LIM, Laguna — Bagsak-kalaboso ang isang anti-narcotics police at isa pa nitong kasabwat matapos na naaresto ng mga tauhan ng Criminal Investigation and Detection Group sa isinagawang buy-bust operation sa Barangay Mulawin sa Tanza, Cavite noong Miyerkules ng umaga.

Kinilala ni P/Senior Supt. Mark Edison Belarma, CIDG Region 4 director, ang mga suspek na sina PO1 Antonio delos Reyes ng Philippine Drug Enforcement Agency- National Capital Region (PDEA-NCR), at ang civilian na si Ofelia de Ocampo.

Ayon kay Belarma, arestado ang mga suspek habang nagbebenta ng droga sa isang pulis na nagpanggap na poseur-buyer na nagkakahalaga ng P500 sa nabanggit na barangay bandang alas-9:30 ng umaga

Nakumpiska sa mga suspek ang dalawang plastic sachets ng methamphetamine hydrochloride (shabu) at iba pang drug paraphernalia

Kasalukuyang nakapiit sa CIDG-Cavite office sa bayan ng Imus ang mga suspek habang inihahanda ang kasong paglabag sa Dangerous Drugs Act of 2000. (Arnell Ozaeta at Cristina Timbang)