Sa inisyal na ulat ng Intelligence and Investigation Office (IIO) ng Subic Bay Metropolitan Authority (SBMA), kapwa naliligo sa sariling dugo nang matagpuan ng mga operatiba ng Scene of the Crime Operatives sina Engr. Leonardo P. Joseph at Dr. Emily Gonzales na may mga tama ng bala ng baril sa ulo.
Bandang alas-9 ng gabi nang narinig ng isang maintenance worker ang pag-aaway ng dalawa sa loob ng kanilang tahanan sa Mango Drive sa bahagi ng Binictican housing.
Matapos ang sigawan ay tatlong sunod na putok ng baril ang umalingawngaw at natagpuan ang dalawa na duguang nakabulagta na may tama ng bala ng baril sa dibdib at ulo ang babae habang isang bala naman sa ngalangala na tumagos sa ulo.
Ayon sa tagapagsiyasat, pinatay muna ng lalaki ang kanyang live-in partner bago ito nagdesisyong wakasan na rin ang buhay sa pamamagitan ng pagbaril sa sarili.
Narekober sa tabi ng bangkay ng inhinyero ang ginamit na baril sa pagpapakamatay ni Joseph matapos barilin nito ang kanyang doktora na pinaniniwalaang nakatalaga sa James L. Gordon Hospital.
Napag-alaman bago pa maganap ang insidente ay may namagitang matinding pagtatalo ang magkasintahan dahil sa planong makipaghiwalay ng babae sa lalaki.