Ang 60-days suspension kay Libmanan Mayor Rodolfo Jimenez, Sr. ay pinirmahan ni Camarines Sur Governor L-Ray Villafuerte noong October 12, 2006 at nakarating lamang sa mga department heads sa munisipyo ng Libmanan nitong Oktubre 17.
Kasong "gross neglect of duty" ang iniharap ni Konsehal Darius Nopra at Jose Dy laban sa kanilang alkalde makaraang hindi pirmahan ni Jimenez ang hinihinging sahod o salary grade ni Roberto Nopra, hepe ng (OSCA).
Depensa naman ng alkalde na kawalan ng sapat na pondo ng lokal na pamahalaan upang hindi makuha ng complainant ang kanyang hinihingi.
Hanggang kamakalawa ay nananatili pa rin sa kanyang puwesto si Jimenez at nagpahayag naman ng malaking suporta ang kanyang mga supporter buhat sa mga barangay official upang harangin ang suspension order na sinasabing isa lamang political harassment. (Francis Elevado)