Sarhento ng Army dedo sa holdap

QUEZON — Pinagtulungang saksakin hanggang sa mapatay ang isang 42-anyos na sarhento ng Phil. Army ng dalawang holdaper ng pampasaherong bus sa kahabaan ng Marcos Highway na sakop ng Brgy. Buensoceso, Gumaca, Quezon kamakalawa ng gabi. Ang biktimang tutulong sana sa hinoholdap na pasahero ay nakilalang si T/Sgt. Edelito Fernandez ng Light Armor Brigade sa Camp Nakar, Lucena City.

Ayon sa tagapagsiyasat na si SPO1 Wilfredo Borgonia, sakay ng AB Liner Bus (DVH-915) ang biktimang inakalang pulis kaya nilapitan ng konduktor upang humingi ng tulong dahil hinoldap ang isang pasahero na si Danilo Belesta. Subalit akmang bubunot ng baril ang biktima kaya pinagtulungan gulpihin at saksakin hanggang sa mapatay ng dalawang holdaper bago mabilis na bumaba ng bus. (Tony Sandoval)