1 sa pumatay sa ina ng consul, arestado

BULACAN, Bulacan – Hindi nakapalag ang isa sa apat na pangunahing suspek sa pagpatay sa isang dating punong-guro at ina ng Pilipinang consul sa Australia nang dakpin ng pulisya dito kamakalawa.

Kinilala ni Police Supt. Noli Pacheco, hepe ng pulisya ng bayang ito ang suspek na si Domingo Chico, 36, isang tricycle driver at nakatira sa Barangay Sta. Ana, Bulacan.

Ayon sa pulisya, nakatanggap sila ng isang tawag mula sa isang impormante at itinuro si Chico dahil ang mga deskripsyong ipinakalat ng pulisya ay tumutugma sa anyo nito.

Agad na bumuo ng isang grupo si Pacheco na kinabibilangan nina SPO1 Danilo Alfonso bilang team leader, PO2 Danilo Estrella, imbestigador, PO3 Rolando Domingo, PO2 Fernando David de Guzman, PO1 Melvin Ongcamua at PO1 Ramirez Perez upang isagawa ang pag-aresto sa suspek sa bahay nito.

Pinaghahanap na rin ang tatlong kasamahan ni Chico, na hinihinalang responsable sa pagnanakaw at pagpatay sa biktimang si Rosalina Lazaro, 74, retiradong punong-guro at ina ni Atty. Ma. Teresa Lazaro, isang konsul na Pinay na nakatalaga sa Australia. (Dino Balabo)