Kinilala ni P/Supt. Gaudencio Masangkay, hepe ng Bauan PNP ang mga nasawi na sina Jerry Bautista, 44 at bayaw nitong si Florante Marasigan, 49, kapwa residente ng Barangay Manghinaw Uno, sa bayan ng Bauan.
Sugatan naman sina Margarita Bautista, 43 at Miguel Bautista, 49, mga residente din sa nabanggit na barangay at kasalukuyang ginagamot sa Bauan Doctor’s Hospital.
Base sa ulat ng pulisya, bandang alas-10:20 ng gabi, masayang kumakanta sa videoke machine si Jerry habang nagdadaos ng handaan sa katatapos na kasalan nang bigla na lang siyang barilin ng bayaw nitong si Florante matapos ang mainitang pagtatalo.
Kaugnay nito, tinamaan din ng ligaw na bala ang asawa ni Jerry na si Margarita at kapatid nitong si Miguel.
Agad namang sinunggaban ng ibang kaanak ng mga biktima si Florante at napatay din ito matapos maagaw sa kanya ang baril at sa kanya naman ipinutok.
Hindi naman matukoy ng pulisya kung sino ang bumaril kay Florante matapos maagaw ang kanyang baril ng isa sa kanyang mga kaanak.
Patuloy pa rin ang imbestigasyon ng pulisya para malaman kung sino ang nakapatay kay Florante at masampahan ng kaukulang kaso. (Arnell Ozaeta)