3 todas sa hostage drama

CAMP CRAME – Napatay sa saksak ang mag-asawa at ang sintu-sintong nang-hostage sa mga ito sa naganap na ilang oras na hostage drama sa resettlement area sa bayan ng Mabalacat, Pampanga kahapon ng umaga.

Ayon kay Director Alejandro Lapinid, police regional office-3, dakong alas- 9:30 ng umaga nang pasukin ng suspek na si Romy Cinco ang bahay ng mag-asawang Caridad, 59; at Rogelio Idluy, 41, sa # 62 St., Block 82 Lot 1, Mawague Resettlement Area sa bayan ng Mabalacat.

Nagkaroon ng argumento sa pagitan ni Cinco at Rogelio hanggang sa pagsasaksakin ng suspek na may kapansanan sa pag-iisip ang lalaki.

Isinunod namang pagsasaksakin ng suspek ang misis ni Rogelio na nadiskubre ang bangkay na tadtad ng saksak sa iba’t ibang bahagi ng katawan sa may palikuran.

Ang dalawang bata na anak ng mag-asawa ay hinostage naman ng suspek sa loob ng kuwarto kung saan matapos ang ilang minutong negosasyon ng mga nagrespondeng operatiba ng pulis-Mabalacat ay tinangkang sugurin ng saksak si SPO2 Manaois.

Bunga nito ay napilitang barilin ang suspek ng mga tauhan ng pulisya na binawian ng buhay habang ginagamot sa pagamutan.

Ang dalawang bata ay nailigtas ng mga awtoridad at ibinigay na sa kanilang mga kamag-anak. (Joy Cantos at Resty Salvador)