Kinilala ni P/Senior Supt. Gil Blando Lebin, CIDG Region 4 chief, ang napatay na suspek na si Christopher Chavez, nakatala bilang number one most wanted person sa kasong droga sa lalawigan ng Rizal.
Arestado naman ang kasamahan ni Chavez na si Pedro Bracamonte Jr., 40, ng San Carlos, Binangonan, Rizal, dating pulis at kapwa nahaharap sa kasong illegal possession of firearms at illegal na droga.
Ayon sa ulat, bandang alas-11:45 ng gabi noong Sabado, nakatakda sanang mag-deliver ng droga ang dalawang suspek sakay ng isang kotseng KIA Pride na may plakang UBC-765 nang masabat ng mga operatiba ng CIDG-Rizal sa pangunguna ni P/Supt. Flaviano Baltazar dahil na rin sa tip ng mga impormante.
Sa panayam kay Baltazar, pinara nila ang sasakyan ng mga suspek, subalit, sa halip na tumigil, pinaputukan pa sila nito, kaya gumanti sila ng putok.
Nagawang pang maitakbo ng mga awtoridad si Chavez sa Tanay General Hospital, pero idineklarang patay dahil sa mga tinamong tama ng bala sa iba’t ibang bahagi ng kanyang katawan.
Nakarekober ang mga pulis mula sa sasakyan ng mga suspek ng isang caliber 45 pistol, mga bala, isang sachet ng shabu at pitong pakete ng pinatuyong dahon ng marijuana.
Nabatid na ang dalawang suspek ay may warrant of arrest na inisyu ni Judge Francisco Querubing ng Antipolo City Regional Trial Court Branch 74. (Arnell Ozaeta, Ed Amoroso At Joy Cantos)