Lalaki dinedo dahil sa pambabato

CAVITE — Pinagbabaril hanggang sa mapatay ang isang 25-anyos na lalaki ng isa sa grupo ng kalalakihan na pinaniniwalaang adik sa droga makaraang mambato ang biktima, kamakalawa ng gabi sa Barangay Burol 1 sa bayan ng Dasmariñas, Cavite. Sapol sa ulo ng bala ng sumpak ang biktimang si Anselmo "Imong" Pipo ng Block 7 Lot 28 ng nabanggit na barangay. Tugis naman ng pulisya ang suspek na si Toto Respi ng Phase 1 ng nasabi ring barangay. Sa imbestigasyon ni PO1 Antonio Guttierez, naitala ang krimen ganap na alas-9:30 ng gabi matapos na mapagtripan ng grupo ng suspek ang kaibigan ng biktima. Nagalit ang biktima sa grupo ng suspek kaya binato nito ang suspek hanggang sa naganap ang pamamaslang. (Cristina Timbang)