Lolo nagbaril sa ulo, patay

CAVITE – Pinaniniwalaang hindi nakayanan ang dumapong dalawang karamdaman kaya nagdesisyong magbaril sa sarili at namatay ang isang 74-anyos na lolo sa harap mismo ng kanyang asawa sa Barangay Salitran 3 sa bayan ng Dasmariñas, Cavite kahapon ng madaling-araw.

Hawak pa ang baril na ginamit sa pagpapakamatay ng biktimang si Modesto Rosilio, dating kawal ng Phil. Constabulary at residente ng Blk 1 Lot 40 Abocado Street, Summerwind 2 sa nabanggit na barangay.

Ayon kay PO1 Antonio Gutierrez, naitala ang insidente ganap na alas-4:30 ng madaling-araw matapos na tawagin ng biktima ang sariling misis.

"Dear halika na rito at magpapaalam na ako," tugon ng biktima, kasabay na itinutok ang baril sa ulo at ipinutok.

Dahil sa naganap na biglaang pangyayari ay natulala ang sariling asawa hanggang sa isinugod sa pinakamalapit na ospital ang duguang biktima, subalit hindi na umabot pa ng buhay. Nag-iwan ng suicide note ang biktima at sinasabing hindi nito makayanan ang dalawang karamdamang nagpapahirap sa kanya. (Cristina Timbang)