4 bayan, 1 lungsod sa Mindoro lumubog

BATANGAS – Lubog sa tubig-baha ang apat na bayan at isang lungsod sa lalawigan ng Oriental Mindoro makaraang rumagasa ang baha mula sa kabundukan at umapaw ang dalawang malaking ilog simula pa noong Martes ng tanghali, ayon sa ulat ng Office of the Civil Defense (OCD-MIMAROPA).

Ayon kay Mr. Edwin Mendoza ng OCD-MIMAROPA, kabilang sa mga lugar na lubog sa tubig-baha ay ang lungsod ng Calapan na may bilang na 48 barangay mula sa kabuuang 62 ang apektado; Victoria-13; Naujan-17; Pinamalayan-6 at hindi pa mabatid ang bilang ng mga barangay na lumubog sa bayan ng Socorro.

Dagdag pa ni Mendoza, na sa Calapan City at lubog na rin ang buong Provincial Capitol Complex, kaya kinansela na ang pasok sa mg apektadong lokal na pamahalaan, mga eskwelahan at inilikas ang 1,500 katao sa mga simbahan.

Nahihirapan ang mga rescue team na makakuha ng sapat na impormasyon dahil sa bumagsak na ang suplay ng kuryente at hindi na rin gumagana ang mga linya ng telepono. Tanging sa pamamagitan na lamang ng cellular phone nakakakuha ng impormasyon ang tanggapan ng OCD.

Bumigay na rin ang tatlong dike na nagpoprotekta sa mag-asawang Ilog at ang Bucayao Bridge sa bayan ng Socorro.Nagmumulang umagos ang malaking volume ng tubig sa Mt. Halcon dahil sa nakakalbong kabundukan.

Hindi na rin madaanan ng lahat ng uri ng sasakyan ang Strong Republic Nautical Highway na nagresulta sa pagkakaroon ng maraming pasahero na stranded sa mga pantalan ng Batangas at Calapan City.

Patuloy naman ang ginagawang paglilikas ng mga tauhan ng Philippine Army, Calapan City Public Safety Department, OCD at provincial government ng Oriental Mindoro sa libu-libong residente na apektado ng malaking pagbaha.

Sinabi naman ni Calapan City Mayor Carlos Brucal, na idineklara na niya ang state of calamity sa lungsod at inutusan na niya ang City Disaster Council na agad magpalabas ng pondo.

Lubhang kailangan ng mga apektadong residente ang mga pagkain, gamot at mga damit kaya umapela ito sa mga kinauukulang ahensya ng gobyerno na tulungan.

Wala pa namang napapaulat na nawawala o kaya ay nasawi sa pagbaha sa Oriental Mindoro.