AFIMA kumilos

Kumilos na ang Alyansa ng Filipinong Mamamahayag (AFIMA) sa pagbibigay pansin sa pangangailangan ng mga mamamahayag partikular na yaong mga biktima ng karahasan.

Personal na nagtungo sa General Santos City si AFIMA Presidente Benny Antiporda upang ipaabot ang kaunting tulong pinansyal kay Mindanao Bulletin correspondent Danilo Aguirre na binaril kamakailan sa harap ng kanilang tanggapan ng hindi pa nakilalang mga salarin.

Iniabot ni Antiporda ang halagang P20,000 bilang tulong sa gastusin ni Aguirre na nakaratay ngayon sa General Santos Doctors Hospital.

Nabatid na ang AFIMA ay itinatag noong Mayo 10, 2005 na naglalayong matugunan ang walang humpay na pamamaslang sa mga miyembro ng pamamahayag.